بازار مَجِ نام خَیلی زمات که اویره
(سه شنبه بازارِ جابجایی واسی)

علی علیزاده ازبری/ بازار مَج کسی ایسه که ایتا لقمه نان حلالِ دونبال ، هفتگی بازارانَ گرده ، بساط پهنَ کونه، تا غروب دم فروشندگی کونه تا خو زن و زاکِ دیل خوشی واسی با دست پور بشه بخانه.بازار مجان همه چی فروشید از محصولات محلی بیگیر تا رخت و لباس و تخته و ساطور، اردک و شلخت و مورغانه تا میوه و سیب زمینی پیاز ،حتی داس،تبر ، اره ، چکش خلاصه هرچی آدم دیل بخوایه بازارمجانِ بساط میان پیدا به. خولاصه شیمی خدمت عرض بوکونم که بازار مج هون کاسبه که از قدیم و ندیم بوگفتایید حبیب خودایه، پس حبیب خدا دستا وا بیگیریم.
هفتگی بازاران ، از قدیم و ندیم امی گیلان میان رواج بداشته و الان هم داره.اقتصاد و کسب و کار امی استان به اَن بازاران وابسته ایسه . اَن مدل بازار ایتا فرصت خوبه که واسی از اون فرصت استفاده کودان . بعضی از اون بازاران خَیلی هم معروف ایسد. بعضی از اون بازاران فروختنِ محصول خاص واسی معروف ایسد. مثلاً تولم شهرِ پنجشنبه بازارکه البته سابق جمعه روزان اویا بازار بوسته ،گاو(مال)فروشانِ واسی شهرت پیدا بوکوده یا شفت ِ دوشنبه بازار ویشتر به برنج فروشان معروفه . انزلی شنبه بازار میان هم که کولی ماهی خو جایه داره. رشت میان که الان ده هر روز بازار ایسه .
سالانِ ساله که فومنِ میان سه شنبه بازار هر هفته و بیدون وقفه ، هوا خوشی و باران ، آفتاب یا حتی برف میانی برپا بووسته . گرچه هیتا کیتاب میانی نینیویشتا که سه شنبه بازار از چی زمان یا کان پادشاه و حکومتِ دوران، شروع بووسته هنقدر دانیم که خَیلی زماتَ که برپا ایسه . وقتی مسئولان بهارِ موقع تصمیم گیرید ایتا نمایشگاه بهاره بر پا بوکونید کلی جلسه نهید، وقت و هزینه کونید. جا انتخاب کونید.خولاصه ایتا عالمه هماهنگی لازم داره تا اون نمایشگاه برپا ببه.اما سه شنبه که آیه اَن بازار مُجان با کمترین دردسر، ایتا یا دو تا خیابانَ سرکونید .بساط پهنَ کونید . در واقع هر هفته بیدون درد سر، ایتا نمایشگاه برگزار کونید. اوشانِ داد و هوار هم جذب مشتری ره جالبه . اوخان زنید
آی گول مار،پیله برار، بایید می ور
حَجی ارزانی بامو
دایی ماما باورده ،زاکانَ به داد باورده
خیار گول بسر. هم پئر بوخوره هم پسر
سیر بوخور پلا بوخور و…
بازار،کلاً بیگیر نیگیر داره .بازار مجان ایتا هفته ممکنه خوب فروشی بدارَد هفته بعد ممکنه به کسادی بازار بر بوخورَه. پاییزِ بازار معمولاً رونق ویشتری داره چون کشاورزان برکت بازارَد و اوشان حضور مرا بازار گرمَ بوهه.ایتا از ضعف های شهر فومن اَنَ که بازارِ روز ناره . هَن موضوع ویشتر باعث رونق هفتگی بازار به. سه شنبه بازار میان ارزان تر شا خرید کودان.بهتر شا خرید کودان. پس سه شنبه روزان که آیه، دیهاتی وشهری ناره .همه سر و کمر دَوَدید که بیشید بازار .یا بفروشید یا بیهینید .ویشتر آدمان هم فروشنده ایسید هم خریدار. اصلا بازار هنه ده، فادخ و فاگیره . از طرفی سه شنبه بازار محل آشنا بوستَن آدمان جای دید و بازدید هم ایسه ،گرچه الان راه و ماشین و آسفالت وجود داره و مردم دهات هر روز تانید بایید شهر، اما سه شنبه روزی ایسه که ویشتر مردمان از همه دهات ِ دور و نزدیک آیید شهر همدیگرا دینید یا فامیلان خانه سر زنید. یواشکی بگم خایله از آشنایی و ازدواج جوانان هم از هَن سه شنبه بازر میان شروع بووسته.
سه شنبه بازار از قدیم وسط شهر ،بازارِ اصلی شهر فومن میان بر پا بوستی. از سال ۶۳ یا ۶۴ شهرداری بازارا به خیابان سردار جنگل منتقل بوکود که سابق اون طرفانَ گوفتید پوشت بازار . تقریبا سی سال بو که بازار اویا برگزارَ بوسته . اما شهرِ فومنِ مشکلاتی ایجاد بوکوداوو.صد البته سه شنبه بازار نواستی کلِ شهرا درگیر بوکونه . چند تا اصلی خیابانِ شهرا دَوَده . اون خیابان ده ظرفیت بازارَ ناشته . همه داد کودید. همه اعتراض داشتید. مسافران سرگردان بید .از اَن سر شهر تا اون سر شهر همه جا بساط پهنَ بوسته . مدیریت شهری دچار چالش بوسته و… پس لازم بو که بازار تغییر بوکونه . خوب الان تغییر بوکوده . شهردار محترمِ دست درد نوکونه. شورای شهرِ دست درد نوکونه. شورای تامین و نیروی انتظامی دست درد نوکونه .من که همسایه جیگای جدید بازار ایسم، دینم که اَشان از ای روز قبل و تا ای روز بعد چقدر زحمت کشید تا اَن بازار بهتر برگزار ببه.
هسا که چند تا هفته بازار، تازه جیگا میان برگزار بووسته هتو نیشان دهه که بازار خوب کرا جا دکفه،هرهفته از هفته قبل بهترَ بوستان دره . گرچه خَیلی از بازار مجان هنوز ناراضی ایسد. جاجیگاه اوشانِ شین دیل بخواه نیه . اما هم فروشنده و هم مشتری خوب استقبال بوکودایید.صد البته کمبود هایی هم داره .کسر و کوتاهی های هم داره . کم کم باید بر طرف ببه . هنوز بعضی از بازار مجانِ جا مشخص نیه .جای بازار محلی فروشان وا دقیق مشخص ببه. چانکشان جا هتو معلوم ببه .کولی ماهی فروشان جا بهتر ببه.کلا جاجیگا وا ویشتر ببه تا مردم راحت تر راه بیشید. ترافیک کنترل ببه . رفت و آمد آسان تر ببه . نور ویشتر ببه .ایتا دستشویی کمه. با اَن همه ،ولی خوب پیش شوآن دره . خوب کرا جا دکفه.هلا که اَنقدر استقبال بووسته . جمعیت هم از هر طرف بازار میان آیید و خوب هم خرید کونید، به فکر آدم رسه که آیا بهتر نیه دو روز در هفته بازار برگزار ببه ؟ مثلا جمعه بعد از ظهر هم بازار ببه . کمر بندی شهید شکوری که جیگای جدید بازاره ،گردشگران و مسافران راه سر هم ایسه ، خایله هم تانه خوب به .تانه مسافر ویشتری باوره فومن ،به قول معروف امتحان که ضرر ناره .

شاهرخ شیر دوست چقدر قشنگ بخوانده

تاریک هوا خرد و خشالَ زنیدی بار
آواره به دونیا چی ا بازار چی او بازار
تی زندگیه چرخانه ها یک شی و سنار
یا حق گی و بار واکونی دیل نیگران
تی موشتری چانه امرو تی جان چلانه
تی اخم واکون باز
تا تی گرم آواز
بولبول تترج مردوم دوخوانه ای دوخوانه ای دوخوانه
ارزان گودیم د بدا نمانه بدا نمانه بدا نمانه بدا نمانه
بازار مج نام خیلی زمات کی اویره
بازار مج قسمت ایی گولی نان و پنیره
بازار هنه ده ایروز گیره ایروز نیگیره
شب کی زاک و زوکِ دیل خوشی بری به خانه
هر چی غم داره تی دیل هورا بیرون فیشانه
تی اخم واکون باز
تا تی گرم آواز
بولبول تترج مردوم دوخوانه ای دوخوانه ای دوخوانه
ارزان گودیم دِ بدا نمانه بدا نماینه
تی قرض نتانستی بدی زار تی احوال
دس خالی بی مشهد نتانستی بیشی امسال
ج درد و بلا بشکسته تی بال می زبان لال
گیرم تره سختی بدا صد جور ا زمانه
غمگین نوا بوستن کی خدا روزی رسانه
تی اخم واکون باز
تا تی گرم آواز
بولبول تترج مردوم دوخوانه ای دوخوانه ای دوخوانه ای دوخوانه
ارزان گودیم د بدا نمانه بدا نماینه